សេវាកម្ម Spotify បានបង់ប្រាក់ទៅកាន់ឧស្សាហកម្មចម្រៀងប្រមាណ ៩ពាន់លានដុល្លារ កាលពីឆ្នាំ២០២៣ ដែលធ្វើឲ្យទឹកប្រាក់សរុបដែលបានបង់ជូនឧស្សាហកម្មចម្រៀងគឺមានរហូតដល់ ៤៨ពាន់លានដុល្លារ គិតចាប់ពីពេលដែល Spotify បង្កើតឡើងដំបូង។
កាលពីខែមីនាឆ្នាំកន្លងទៅ Spotify និយាយថា ជិត ៧០% នៃចំណូលដែលខ្លួនទទួលបាន គឺបានបង្វិលជូនឧស្សាហកម្មចម្រៀង ដោយចំណូលនេះទទួលបានពីប្រភពចំនួនពីរ រួមមានការបង់សេវាកម្មប្រចាំខែពីអ្នកប្រើប្រាស់ និងការផ្សព្វផ្សាយពាណិជ្ជកម្មលើចម្រៀងសម្រាប់អ្នកស្ដាប់ដែលឥតបង់លុយ។
អ្នកដែលទទួលបានសិទ្ធិទទួលបានថវិកាពី Spotify គឺម្ចាស់កម្មសិទ្ធិនៃបទចម្រៀងដែលមានដូចជាផលិតកម្មចម្រៀង ក្រុមហ៊ុនចែកចាយចម្រៀង និងក្រុមហ៊ុនចេញផ្សាយចម្រៀង ជាដើម។ បន្ទាប់ពីម្ចាស់កម្មសិទ្ធិទទួលបានហើយ ទើបអ្នកបង្កើតទទួលបានការចែកជាភាគរយតាមក្រោយពីម្ចាស់កម្មសិទ្ធិ។
គួរដឹងថាកាលពីត្រីមាសទីបីនៃឆ្នាំ២០២៣ ក្រុមហ៊ុន Spotify ទទួលបានអ្នកប្រើប្រាស់ប្រចាំខែ ២៨លាននាក់បន្ថែមទៀត ដែលធ្វើឲ្យចំនួនអ្នកប្រើសរុបកើនដល់ ៦០២លាននាក់ ហើយក្នុងនោះមាន ២៣៦លាននាក់ ជាអ្នកប្រើប្រាស់បង់លុយ៕