ផ្អែកតាមទិន្នន័យដែលរៀបចំដោយស្ថាប័ន Levels.fyi ជាស្ថាប័នដែលតែងតែប្រមូលផ្ដុំទិន្នន័យប្រាក់បៀរវត្ស៍សម្រាប់បុគ្គលិកបច្ចេកវិទ្យា បានបង្ហាញថា សហរដ្ឋអាមេរិកជាទីតាំងដែលមានក្រុមហ៊ុនផ្ដល់ប្រាក់បៀរវត្ស៍ដល់បុគ្គលិកផ្នែកវិស្វករ Software ច្រើនជាងគេ។
ក្នុងឆ្នាំ២០២៣ វិស្វករ Software ទទួលបានប្រាក់ប្រចាំឆ្នាំជាមធ្យម ៣០៨ ០០០ដុល្លារ កើនឡើង ២% ធៀបនឹងប្រាក់ ៣០១ ០០០ដុល្លារ កាលពីឆ្នាំ២០២២។
ក្នុងនោះដែរ ក្រុមហ៊ុន AI ឈ្មោះថា OpenAI បានផ្ដល់ប្រាក់ប្រចាំឆ្នាំខ្ពស់ជាងគេ ដោយមួយឆ្នាំបានរហូតដល់ ៩២៥ ០០០ដុល្លារ សម្រាប់វិស្វករ Software កម្រិត L5 ជាតំណែងខ្ពស់មួយប្រចាំក្រុមហ៊ុន។ ចំណាត់ថ្នាក់លេខពីរគឺក្រុមហ៊ុន Coupang ដែលផ្ដល់ប្រាក់ប្រចាំឆ្នាំ ៦០០ ០០០ដុល្លារ និងបន្ទាប់មកគឺក្រុមហ៊ុន Clubhouse ដែលផ្ដល់ប្រាក់ប្រចាំឆ្នាំ ៥៦៦ ០០០ដុល្លារ។
គួរដឹងថាក្រុមហ៊ុនដែលផ្ដល់ប្រាក់ប្រចាំឆ្នាំច្រើនជាងគេទាំង ១៦ លើកលែងតែ OpenAI មួយ ភាគច្រើនគឺជាក្រុមហ៊ុនហិរញ្ញវត្ថុ ឬក្រុមហ៊ុនបច្ចេកវិទ្យាហិរញ្ញវត្ថុ ដូចជា Coinbase, Stripe និង Hudson River Trading ជាដើម៕