កម្មវិធីដ៏ល្បី២គឺ YouTube និង Spotify មិនមានគម្រោងដាក់កម្មវិធីរបស់ខ្លួនសម្រាប់ឧបករណ៍ Vision Pro របស់ Apple នោះទេ នេះបើយោងតាមរបាយការណ៍ថ្មីពី Bloomberg។ YouTube បាននិយាយថា ខ្លួនមិនកំពុងបង្កើតកម្មវិធី YouTube សម្រាប់ Vision Pro ទេ ហើយក៏មិនអនុញ្ញាតឱ្យកម្មវិធី YouTube ប្រើ iPad ដំណើរការលើឧបករណ៍ពាក់ក្បាល Vision Pro នោះដែរ។
រីឯកម្មវិធីស្ដាប់តន្ត្រី Spotify ក៏មិនដំណើរការលើ Vision Pro នោះដែរ ហើយវាក៏មិនមានគម្រោងអនុញ្ញាតឱ្យកម្មវិធី Spotify មានលើ iPad អាចប្រើបានតាមរយៈ Vision Pro App Store នោះដែរ។ តែយ៉ាងណា YouTube និង Spotify នឹងអាចចូលប្រើបានតាមរយៈ Safari ដែលស្រដៀងទៅនឹង Netflix ផងដែរ។ ក្រុមហ៊ុន Netflix បាននិយាយកាលពីដើមសប្តាហ៍នេះថា អតិថិជនរបស់ Netflix អាចមើលមាតិការបស់ខ្លួន តាមរយៈកម្មវិធី Browser តាមអ៊ីនធឺណិត Vision Pro។
អាចថានេះ ជាការសម្លឹងមើលពីក្រុមហ៊ុនផ្សេងៗ ទៅកាន់ Vision Pro ដោយសារឧបករណ៍នេះមានតម្លៃថ្លៃ ហើយបើជោគជ័យផ្ទុះទីផ្សារ នោះកម្មវិធីល្បីៗជាច្រើន នឹងហក់មកកាន់ Vision Pro ជមិនខាន។ គួរបញ្ជាក់ថា Vision Pro បើកឱ្យកម្មង់ហើយនៅអាមេរិច នៅថ្ងៃទី១៨ ខែមករា ដោយនឹងចាប់ផ្ដើមលក់ជាផ្លូវការនៅថ្ងៃសុក្រ ទី២ ខែកុម្ភៈ៕