សេដ្ឋីទឹកសុទ្ធចិន កើនលុយ ៥ ពាន់លានដុល្លារក្នុងមួយថ្ងៃ ក្លាយជាអ្នកមានបំផុតទី៦ លើលោក

អ្នកមានបំផុតថ្មីថ្មោងរបស់ប្រទេសចិនម្នាក់ បានកើនលុយចំនួន ៥,៤ ពាន់លានដុល្លារបន្ថែមទៀត ដល់ទ្រព្យសម្បត្តិសរុបរបស់ខ្លួន។

ពាណិជ្ជកម្ម

លោក Zhong Shanshan ប្រធានក្រុមហ៊ុនផលិតទឹកបរិសុទ្ធ Nongfu Spring ឥឡូវនេះបានក្លាយជាអ្នកមានបំផុតទី ៦ នៅលើពិភពលោក ជាមួយនឹងទ្រព្យសម្បត្តិសរុប ៩២,១ ពាន់លានដុល្លារ ដោយសារការកើនឡើងនៃតម្លៃភាគហ៊ុននៅក្រុមហ៊ុនរបស់លោក។

ក្រុមហ៊ុនដែលបានចុះបញ្ជីនៅទីក្រុងហុងកុងនេះ បានចេញជាសាធារណៈកាលពីខែកញ្ញាឆ្នាំមុន ហើយភាគហ៊ុនរបស់វាបានកើនឡើងតម្លៃ ៣ ដង ក្នុងរយៈពេល ៤ ខែកន្លងមកនេះ។ កាលពីថ្ងៃអង្គារតែឯង ភាគហ៊ុនបានកើនឡើង ៦,៥% ឯណោះ។

គួរឲ្យដឹងថា លោក Zhong បានកាន់កាប់ភាគហ៊ុន ៨៤,៤% របស់ក្រុមហ៊ុន។ លោក និងសាច់ញាតិរបស់ប្រពន្ធ មានភាគហ៊ុនរួមគ្នា ៦,២% បន្ថែមទៀត ហើយវិនិយោគិន ៦៣ នាក់ផ្សេងទៀត ដែលភាគច្រើនជានិយោជិកបច្ចុប្បន្ន និងជាអតីតអ្នកពិគ្រោះយោបល់មានកម្មសិទ្ធិរួម ៦%៕