[ទីផ្សារបរទេស] រថយន្តបុរាណ Ferrari 250 GTO ឆ្នាំ១៩៦២ ត្រូវបានលក់ដេញថ្លៃបានសម្រេចក្នុងតម្លៃ ៥១,៧លានដុល្លារ ក្នុងពិធីដេញថ្លៃ RM Sotheby’s ដែលធ្វើឡើងកាលពីថ្ងៃទី១៣ ខែវិច្ឆិកាកន្លងទៅ។
ជាមួយតម្លៃនេះ Ferrari 250 GTO ឆ្នាំ១៩៦២ បានជាប់ឈ្មោះជារថយន្តដែលលក់ដេញថ្លៃជាសាធារណៈបានតម្លៃខ្ពស់ជាងគេបំផុតក្នុងប្រវត្តិសាស្ត្រ និងជាប់លេខពីរបើរាប់បញ្ចូលទាំងការដេញថ្លៃបែបឯកជន ដោយរថយន្តលេខមួយគឺ Mercedes 300 SLR Uhlenhaut Coupe ដែលលក់ដេញថ្លៃបែបឯកជន បានតម្លៃ ១៤៤លានដុល្លារ កាលពីឆ្នាំ២០២២។
រថយន្ត Ferrari 250 GTO ជារថយន្តដែលផលិតមានចំនួនកំណត់ដោយមានផលិតត្រឹមតែ ៣៦គ្រឿងប៉ុណ្ណោះ ដែលធ្វើឲ្យអ្នកចូលចិត្តប្រមូលវត្ថុមានតម្លៃប៉ុនប៉ងចង់បានវា។ អ្វីដែលធ្វើឲ្យរថយន្តនេះកាន់ពិសេសគឺវាធ្លាប់បានចូលរួមការប្រណាំង Nürburgring នៅឆ្នាំ១៩៦២ ដោយជាប់លេខ១ ប៉ុន្តែនៅឆ្នាំដដែល វាបានបរាជ័យក្នុងការប្រណាំង 24 Hours of Le Mans ដោយសារបញ្ហាឡើងកម្ដៅ។
Ferrari 250 GTO មានបំពាក់ម៉ាស៊ីន ៤លីត្រ ផលិតកម្លាំងបាន ៣៩០សេះ ជាតួលេខដ៏ខ្ពស់បំផុតមួយនៅឆ្នាំ១៩៦២។ បន្ទាប់ពីត្រូវបានប្រើក្នុងការប្រណាំងជាច្រើន រថយន្តនេះត្រូវបានលក់ឲ្យមហាសេដ្ឋីនៅអាមេរិក បន្ទាប់មកក៏បានធ្លាក់ចូលទៅក្នុងដៃអ្នកប្រមូលទិញរបស់កម្រនៅរដ្ឋ Ohio ក្នុងឆ្នាំ១៩៨៥ ដែលម្ចាស់រូបនេះបានដាក់លក់វាដេញថ្លៃកាលពីថ្ងៃទី១៣ ខែវិច្ឆិកា៕