United Airlines បានក្លាយជាក្រុមហ៊ុនអាកាសចរណ៍ចុងក្រោយបង្អស់ ដែលប្រកាសពីពេលវេលាដើម្បីហោះហើរយន្តហោះ Boeing 737 MAX ម្តងទៀត ដោយនិយាយថា យន្ដហោះនេះនឹងចាប់ផ្តើមហោះហើរឡើងវិញនៅខែកុម្ភៈ។
យន្តហោះដែលទុកចោលអស់រយៈពេល ២០ ខែ បន្ទាប់ពីជួបគ្រោះថ្នាក់ចំនួន ២ លើក នឹងវិលចូលបម្រើសេវាកម្មរបស់ United Airlines នៅថ្ងៃទី ១១ ខែកុម្ភៈ ដោយមានសេវាកម្មពីទីក្រុង Denver និងទីក្រុង Houston ។
ការផ្លាស់ប្តូរនេះកើតឡើងបន្ទាប់ពីការសម្រេចចិត្តរបស់សហព័ន្ធរដ្ឋបាលអាកាសចរណ៍ Federal Aviation Administration (FAA) ក្នុងខែវិច្ឆិកា ដើម្បីអនុញ្ញាតឲ្យយន្តហោះនេះហោះហើរម្តងទៀត បន្ទាប់ពីការធ្វើឲ្យប្រសើរឡើង (upgrade) នូវកម្មវិធី (software) និងពិធីសារ (protocol) ថ្មីស្តីពីការបណ្តុះបណ្តាលអ្នកបើកយន្តហោះ។
ក្រុមហ៊ុន United Airlines បាននិយាយថា វានៅតែមានការងារបន្ថែមទៀតដែលត្រូវធ្វើនៅលើយន្តហោះរបស់ខ្លួន មុនពេលពួកគេអាចវិលត្រឡប់មកបម្រើសេវាកម្ម ជាមួយក្រុមហ៊ុនអាកាសចរណ៍វិញ។
គួររំលឹកឲ្យដឹងដែរថា ការធ្លាក់យន្តហោះ Boeing 737 MAX ចំនួន ២ លើក នៅប្រទេសអេត្យូពី និងឥណ្ឌូនេស៊ី បានឆក់យកជីវិតមនុស្សចំនួន ៣៤៦ នាក់ និងឈានដល់ការផ្អាកហោះហើរយន្តហោះម៉ូដែលនេះទូទាំងពិភពលោកតែម្តង៕