AT&T និង Discovery ចាប់ដៃគ្នាដើម្បីបង្កើតសេវាកម្ម Streaming យក្សថ្មី

ក្រុមហ៊ុនទូរគមនាគមន៍ដ៏ធំរបស់អាមេរិក AT&T បានយល់ព្រមបញ្ចូលគ្នា នូវអាជីវកម្ម WarnerMedia របស់ខ្លួន ជាមួយ Discovery ក្នុងកិច្ចព្រមព្រៀងដើម្បីបង្កើតសេវាកម្ម Streamingយក្សថ្មីមួយ។

ការរួមបញ្ជូលគ្នានេះ នឹងនាំឲ្យស្ទូឌីយោធំបំផុតរបស់ Hollywood និងបណ្តាញប៉ុស្តិ៍ Discovery ស្ថិតនៅក្រោមកម្មសិទ្ធិតែមួយ។

គួរឲ្យដឹងដែរថា ក្រុមហ៊ុន AT&T ជាម្ចាស់ទូរទស្សន៍ CNN, HBO និង Warner Bros បន្ទាប់ពីបានទិញក្រុមហ៊ុន Time Warner ក្នុងតម្លៃ ១០៨,៧ ពាន់លានដុល្លារ ក្នុងឆ្នាំ ២០១៨។

ការរួមបញ្ចូលគ្នាដែលបានស្នើឡើងនេះ នឹងដាក់បញ្ចូលគ្នានូវខ្សែភាពយន្តខ្នាតយក្សរបស់ Warner Bros. Entertainment ជាមួយនឹងកម្មវិធីជាច្រើនរបស់ Discovery ដូចជាកម្មវិធីចំអិនម្ហូប, ធម្មជាតិ និងវិទ្យាសាស្ត្រ ជាដើម៕