Musk លក់ភាគហ៊ុន Tesla តម្លៃ ១ ពាន់លានដុល្លារ

យោងតាមប្រភពព័ត៌មានបានឲ្យដឹងថា កាលពីថ្ងៃព្រហស្បតិ៍កន្លងទៅនេះ នាយកប្រតិបត្តិក្រុមហ៊ុន Tesla លោក Elon Musk បានលក់ភាគហ៊ុនចំនួន ៩៣៤ ០៩១ ផ្សេងទៀត នៃក្រុមហ៊ុនផលិតរថយន្តអគ្គិសនីខាងលើ ដែលមានតម្លៃស្មើនឹង ១,០១ ពាន់លានដុល្លារ ដើម្បីបំពេញកាតព្វកិច្ចពន្ធរបស់លោក ទាក់ទងនឹងការអនុវត្តជម្រើសក្នុងការទិញភាគហ៊ុនចំនួន ២,១ លានហ៊ុន។

គួររំលឹកឲ្យដឹងថា កាលពីដើមខែវិច្ឆិកា មហាសេដ្ឋីលំដាប់ពិភពលោករូបនេះ បានបង្ហោះសារថា លោកនឹងលក់ភាគហ៊ុនរបស់ខ្លួនចំនួន ១០ ភាគរយ ប្រសិនបើអ្នកប្រើប្រាស់ប្រព័ន្ធផ្សព្វផ្សាយសង្គមបានយល់ព្រម។ ក្នុងនោះ ពួកគេភាគច្រើនបានយល់ព្រមជាមួយការលក់។

ចាប់តាំងពីថ្ងៃទី៨ ខែវិច្ឆិកា មក លោក Musk បានអនុវត្តជម្រើសដើម្បីទិញភាគហ៊ុនចំនួន ១០,៧ លានហ៊ុន និងបានលក់វិញ ១០,១ លានហ៊ុន ក្នុងតម្លៃ ១០,៩ ពាន់លានដុល្លារអាមេរិក។

យ៉ាងណាមិញ បន្ទាប់​ពី​ការ​អនុវត្ត​ជម្រើស​ដ៏​ច្របូកច្របល់ លោក Musk នៅ​តែ​មាន​ជម្រើស​ក្នុង​ការ​ទិញ​ហ៊ុន​ប្រហែល ១០ លាន​ហ៊ុន​បន្ថែម​ទៀត​ក្នុង​តម្លៃ ៦,២៤ដុល្លារក្នុង​មួយ​ហ៊ុន ដែល​នឹង​ផុត​កំណត់​នៅ​ខែ​សីហា ឆ្នាំ​ក្រោយ៕