ហាង IKEA ធំបំផុតលើពិភពលោក បើកនៅទីក្រុងម៉ានីល

ក្រុមហ៊ុន IKEA បានបើកហាងធំបំផុតរបស់ខ្លួន ក្នុងប្រទេសហ្វីលីពីន ដោយមានទំហំប្រហែល ៦៧ ៨០០ម៉ែត្រការ៉េ នៅទីក្រុងម៉ានីល ដែលជាមូលដ្ឋានគ្រឹះនៃផែនការពង្រីកក្រុមហ៊ុននៅអាស៊ី។

គួរឲ្យដឹងថា ហាង IKEA ខាងលើនោះ មានហាង, កន្លែងញ៉ាំអាហារ, Showroom, ឃ្លាំងទំនិញ និង Call Center ជាដើម។ ការបើកដំណើរការហាងថ្មីនេះ បានកើតឡើងនៅពេលដែល IKEA បានពង្រីកវត្តមានពាណិជ្ជកម្មអេឡិចត្រូនិករបស់ខ្លួន ដែលបានបង្ហាញឲ្យឃើញថា ក្នុងអំឡុងពេលនៃជំងឺរាតត្បាតកូវីដ១៩ ចំនួនលក់នៅទូទាំងពិភពលោករបស់វាចំនួន ២៦% ត្រូវបានធ្វើឡើងតាមរយៈអនឡាញ។

ក្រុមហ៊ុនដែលមានហាងទំនិញជាង ៤៦០កន្លែង ក្នុងប្រទេសប្រហែល ៦០ នេះ គ្រោងនឹងបន្ថែមទីតាំងជិត ៦០កន្លែងបន្ថែមទៀតក្នុងឆ្នាំហិរញ្ញវត្ថុបច្ចុប្បន្ន។

យ៉ាងណាមិញ ក្រុមហ៊ុន IKEA មិនត្រឹមតែសម្លឹងឆ្ពោះទៅរកទីផ្សារអាស៊ីតែប៉ុណ្ណោះទេ តែវានឹងបោះជំហានដំបូងរបស់ខ្លួនទៅកាន់អាមេរិកខាងត្បូង ដោយបើកសាខានៅទីក្រុង Santiago ប្រទេសឈីលី ទៀតផង៕